Lectura Rumantscha

Patgific sura e sut

La naiv manca anc, ma Giochen Bearth na fa nagins quitads. Fin mez mars pon anc bleras scrottas chattar la via sin las muntognas sur Mustér, e gliez sa il president dal comité d’organisaziun da la Trofea Péz Ault. Las cursas da turas da skis han lieu quest onn per la 15avla giada. Ils organisaturs vulan cuntanscher dapli participantas e participants che n’han betg en mira il temp, mabain il giudiment. Persunas pli «patgificas», in pau sco la naiv che lascha temp.

Restar u betg restar?

Vul ella u vul ella betg? Quai è la gronda dumonda. Dapi che Gianna Luzio ha demissiunà sco co-presidenta da la Lia Rumantscha l’october passà timunescha Urezza Famos suletta l’instituziun. Ussa tschertga la Lia ina successiun per Gianna Luzio – per in co-presidi u per in presidi. I dependia in pau da las candidaturas, sch’ella vegnia a restar en uffizi u betg, ha declerà Urezza Famos.

Otg abitaziuns sco remedura

Jau hai per cletg ina abitaziun e na stoi betg tschertgar ina, surtut betg en in lieu turistic. Vischnancas ed auters acturs emprovan da far frunt a la mancanza d’abitaziuns pajablas per indigens. Ina pitschna remedura è la chasa planisada da la Fundaziun Puntraschigna ad otg abitaziuns gist davos il Rondo. Qua sai jau be dir: Spert t’annunziar, perquai la mancanza n’è betg anc surmuntada.

A revair e bun divertiment cun la Lectura Rumantscha!