Lectura Rumantscha

La Lectura Rumantscha – senza firlefanza:

Turnar pass a pass a Brinzauls

Igl è in mument istoric! Suenter 62 emnas è il vitg da Brinzauls puspè «avert»: L’auto da posta charrescha tras vischnanca ed ils abitants turnan plaunsieu puspè. Ma quai succeda be plaun e plat, sco quai ch’il president communal Daniel Albertin ha ditg envers la FMR ch’ha fatg viadi a Brinzauls.

Las flommas da Vulpera

Igl è stà in dals gronds brischaments da l’istorgia grischuna. Il matg 1989 è ars giu il famus Hotel Waldhaus a Vulpera. Il donn en francs e raps: 23 milliuns. Victimas n’hai per fortuna dà naginas. Ma sco ch’igl è tar brischaments – quai mussa il cas actual da Crans-Montana – èsi da sclerir responsabladads e culpas. Var 36 onns pli tard n’è «il cas Vulpera» dentant adina anc betg sclerì. Cun il film documentar «Herbstfeuer» emprova il reschissur Roman Vital da scuvrir intgins misteris enturn il brischament ed empermetta perfin novs fatgs e novas perspectivas.

Chau d’alp – in job per tai?

Avessas ti gust da lavurar sin in’alp, schegea che ti n’has forsa gnanc gì da far grond cun agricultura fin ussa? Perquai ch’ils manaschis agriculs vegnan adina pli gronds, resta per puras e purs mo pauc temp per s’engaschar per lur alps, scriva il redactur Andreas Cadonau. Il Plantahof a Landquart s’è conscient da questa problematica e porscha perquai da nov in curs per la gestiun d’alp –  explicitamain per novizs e novizas sco ti!

Bun divertiment cun la Lectura Rumantscha!