Lectura Rumantscha

Ils gladiaturs da Trin

Uss èsi definitiv. Ils ballapedists da Trin na turnan betg pli en lur arena Prau Davon. Lur plazza da ballape a Trin Mulin vegn da nov dada a fit. Inclus saja sper la plazza sezza er in local per material, duas gardarobas e duas tualettas. Anc ussa n’hajan ins dentant nagin successur per ils gladiaturs da la CB Union Trin che han tratg lur chalzers da ballape in toc pli lunsch. Lur spiert cumbattiv vivan els ussa ora cun dar curling u bowling e sumegliant.

L’erox dal Rachögna-Resort

La guerra da Troja ha cuzzà diesch onns, l’Odissea ha medemamain cuzzà diesch onns – e la realisaziun dal resort Rachögna a Scuol? Forsa 20 u dapli – tgisà? Quest resort è gia dapi prest 16 onns en planisaziun ed ina fin è be plaunet en vista. Cun ina retratga dal project n’èsi tuttina betg da quintar. Sco la guerra da Troja e l’Odissea ha er il Rachögna ses erox: Hansueli Baier. El ha ditg envers la FMR: «Nus na laschain betg crudar quest project.»

Barlot total en Surses

U amar u odiar – insatge tranteren na datti betg en connex cun tschaiver. Tge ch’jau pens da guggas, canera, confettis e mascaradas, quai na tradesch jau betg. Viver e laschar viver! Tgi che desiderescha il barlot total, po entant sa render patgificamain en il Surses questa fin d’emna. A Salouf spetga numnadamain in til d’uffants cun participaziun dals Fetters Sursetters ed a Riom la preschentaziun usitada d’in teater da tschaiver. Bun divertiment – e silsuenter buna curaisma!

A revair e bun divertiment cun la Lectura Rumantscha!