«Que gnaro bger pü cher per las vschinaunchas»
Il president cumünel da S-chanf Gian Andrea Bott ho proponieu a las votantas e’ls votants da sieu cumün da refüser la Sanadura e las cunvegnas da prestaziuns pel rest da l’an – ma sainza success. Zieva la decisiun in radunanza cumünela ho el declaro perche ch’el craja cha uossa dvantaro tuot auncha pü cher e cumplicho i’l provedimaint da sandet.
Gian Andrea Bott es in uffizi scu president cumünel da S-chanf pür daspö principi d’an – el ho surpiglio quella incumbenza in ün mumaint magari dramatic illa politica regiunela da sandet. Sia suprastanza ed el haun scu unic gremi executiv in Engiadin’Ota decis da propuoner ün NA a la ledscha per funder la Sanadura ed a las trais cunvegnas da prestaziun pel provedimaint da sandet regiunel. Üna pusiziun chi l’ho purto illa prüma radunanza cumünela scu president üna sconfitta.
FMR: Sar Gian Andrea, eir El varo fat quint cun que cha S-chanf dia SCHI a la Sanadura. Es El surprais dal resultat magari cler?
Gian Andrea Bott: Na propi. Nus vessans cret cha forsa ün pêr dapü dian NA. Ma quista soluziun es gnida schmacheda tres uschè svelt e veementamaing, eir las medias haun focusso plainamaing sün l’urgenza e’ls argumaints da la presidenta dal cussagl da fundaziun da la SGO. Scha que vo in quella direcziun es la schanza pitschna da rabaglier tres ün’alternativa.
Haun Els preschanto Lur argumaints e Lur critica saviand cha la chosa es vairamaing già clera?
Scha S-chanf vess propi dit da NA vess que forsa müdo ün po la situaziun. Ma zieva la votumaziun cunter la SGO al principi da november e la dumanda per ün moratori tar il güdisch regiunel al principi da december es que greiv da motiver per üna sanaziun da la SGO. Bgers d’eiran uossa stüfs e marschs da quist tema.
El es da l’avis cha uossa dvainta tuot auncha pü cumplicho?
Schi, tenor me dvainta que uossa bger pü cumplicho. Eau nu craj chi gratagia da gestiuner la Sanadura a lungia vista cun quistas structuras, cun ün gremi politic ed ün administrativ. Mieu cussagl d’eira d’ingascher almain üna persuna in tuots duos gremis, scu tar la Fundaziun da l’Ospidel Chantunel Grischun. Martin Schmid, il president dal cussagl da fundaziun, es al listess mumaint eir president dal cussagl administrativ. Uscheja s’ho que üna persuna chi tira, ma chi realisescha eir las decisiuns. Ma tar nus as voul duos gremis differents cun differentas idejas. Quel sbagl s’ho fat già dal 2018 cun funder la SGO.
Illa radunanza cumünela ho El fat la prognosa cha que vegna uossa tuot auncha pü cher per las vschinaunchas. Perche?
Schi, que gnaro bger pü cher per las vschinaunchas. Ad es cler cha l’ospidel chantunel scu organisaziun privata voul avair eir ün guadagn. Els vegnan cò per guadagner raps. E nus nu stuvarons pajer be ils cuosts, ma eir üna marscha da guadagn. Ed eau sun persvas cha l’ospidel chantunel suotvalütescha la situaziun cò tar nus. Els haun fat il conguel cun Walenstadt, inua ch’els gestiuneschan eir l’ospidel e inua ch’els haun ün simila quantited da paziaints düraunt l’an. Ma tar nus variescha il numer da paziaints fich ferm. A Nadel sun cò 80 000 persunas impü illa regiun, la situaziun es otra cu a Walenstadt. Intaunt es l’ospidel a Samedan plain, ma listess es previs üna reducziun dals lets.
Cu vo que uossa inavaunt?
Eau nu saro part dal cussagl da sandet da la Sanadura. A s’ho giavüscho chi dessan gnir nouvas vistas in quel gremi. Per S-chanf s’ho miss a disposiziun il cusglier cumünel Paolo Bernasconi. Ma bger nu varon las vschinaunchas pü da dir, culla nouva structura as diminuescha l’influenza da las vschinaunchas.
Sch’El guarda inavous süls ultims mais – cu as po que explicher ch’ün proget politic telmaing important riva in üna da las regiuns las pü richas da la Svizra in üna situaziun telmaing dramatica?
La politica es megldra, scha nu sun avaunt maun memma bgers raps. Scha s’ho da memma… [ria] Que es uscheja.
Gust da leger dapli?