Lectura Rumantscha

Bun di e bainvegni al pli bel mument dal di! – Almain sch’era ti legias la gasetta durant ensolver e cun in bun cappuccino sco la columnista Giulia Romano.

Lumnezia: investiziuns relativas

Tut è relativ. Quai n’è betg mo in princip e pilaster da la fisica, mabain era da las investiziuns en Lumnezia. La vischnanca quinta cun 42 milliuns francs investiziuns ils proxims onns. Per las valurusas ed ils valurus Lumnezians è quai dentant nagut che fa tremblar. Ins investeschia la finala tuttina mo tant sco ch’ins possia e guardia dad onn tar onn, uschia il capo-valurus Daniel Solèr. Relativmain simpel, u betg?

Sanadura: ina dira pagliola

SCHI – igl è stà ina dira nusch, la pagliola da la Sanadura. NA – tuts n’èn betg cuntents cun il poppin ch’è ussa sin maisina. Tenor il president da S-chanf Gian Andrea Bott n’è en pli betg mo il poppin il fallà, mabain era la pagliola vegnida smatgada tras memia svelt. D’ina opiniun dal tuttafatg opposta è dentant Gian Gilli. Il poppin na saja betg mo l’endretg, mabain in vair diamant. Uschia ha il manager da sport engrazià tranter auter a la presidenta da Bever Selina Nicolay per la Sanadura – «la soluziun optimala».

Energia per tuts, ma da tgi?

«Nova energia per in bun avegnir.» – Tge bel slogan! Gea, cura ch’i va per bellas frasas, na datti nagut da reproschar a la EWZ (Ovras electricas da Turitg). Quella producescha «energia per tuts – persistent, innovativ e simpel.» Dal reminent er en il Surses. Cun quai pudessi aber «imfall» esser a fin l’onn 2035. Il Chantun e la vischnanca sa preparan numnadamain per l’uschenumnà «Heimfall».

Cun u senza coffein – bun divertiment cun la Lectura Rumantscha!