Politichers ston adina esser «cools»

Igl 1. da schaner 2014 ha la vischnaunca dad Ilanz/Glion entschiet a viver e funcziunar. Igl ei ina mischeida da 12 vitgs ed in marcau. Igl ei in construct ch’ei carschius anorganicamein. Cun in plum ha ei dau ina vischnaunca gronda e nova. Dapi lu ei quella vidlunder da sesviluppar, crescher ensemen e mussar ina structura cumineivla. Las autoritads fan tut ils sforzs per quella cohesiun, per unificar ed esser gests cun tuts. Quei ei tut auter che sempel e va pli plaun che quei che biars cartevan.

La vischnaunca fa dus pass anavos ed in anavos. Adina puspei ein las finanzas in tema. Las pli pintgas expensas vegnan criticadas e spargnar ei in verb fetg derasau ad Ilanz/Glion. Cullas propostas adequatas ein denton buca tuts cuntents. Mintga gruppa d’interess mira criticamein sin tut quei che vegn ord Casa Cumin. Antennas 5G, uffeci da baghegiar, revisiun dalla constituziun … adina puspei dat ei motivs pil pievel da far intervenziuns, iniziativas e petiziuns. Quei ei democrazia vivida. Atgnamein ei tut quei in svilup e process exemplaric.

La petiziun ch’ei ussa deponida ella canzlia da Glion ei in exempel dapli da quei strer e stuschar ad Ilanz/Glion. E miez lien ei in protagonist ch’ha fatg furora quels gis: il president communal. Ina persuna en quei uffeci sto haver saung freid e pial dira. Ella sto star botta per tut, ed astga buca mussar emoziuns. Sch’ins ha – sco parsura d’ina vischnaunca – il saun che buglia, resta ei nuot auter che da restar ruasseivels. Politichers ston esser «cools» ed acceptar auters meinis. Quei ch’ei schabegiau en casa cumin ei deplorabel – e buca d’avantatg pil renum dalla vischnaunca e per la reputaziun dil president. Marcus Beer sto setschentar la damonda sch’el vul far vinavon politica. Sch’el survegn persuenter la carta cotschna ni la melna, vegn gl’arbiter, il parlament communal, a decider ils 18 da fevrer. Facit: In politicher che muossa gretta e ch’ei vilaus – quei sa generar clics ellas medias socialas. Tgi che profitescha la finala da quei, astg’ins sedumandar. Suenter la sbarrada en casa cumin.