Lectura Rumantscha

Tge bel, la primavaira è qua e cun ella l’emprima lectura dal mars!

L’emprim il scarun e l’ogna

Anc è il Glogn in vatga sontga, vul dir ch’il flum è intact e betg tschiffà per producir electricitad. L’Ovra electrica Zervreila (OEZ) vul dentant midar quai e «far meztga». Planisà è in conduct da 13 kilometers da Puzzatsch tochen Giuvaulta per trair a niz las auas lumnezianas. Cuntravent datti dentant da las organisaziuns per la protecziun da la natira. Prioritad n’haja betg la producziun d’electricitad, mabain – sper ina vatga sontga intacta – er il scarun e l’ogna.

L’emprim venderdi da mars

Avant 33 onns ha Antonia Caduff per l’emprima giada translatà la liturgia dal Di d’oraziun mundial en sursilvan. Alura resunavan dal radio hits sco «I Will Always Love You» da Withney Houston u «Somebody dance with me» da DJ BoBo. Entant èn il stil sco er il med da tadlar musica sa midads (per fortuna?). Antonia Caduff percunter è stada fidaivla a sia lavur da translatura durant ils ultims trais decennis. Però la 33avla giada è la davosa, sco ch’ella ha ditg envers la FMR. Dal reminent, il Di d’oraziun mundial è mintgamai l’emprim venderdi da mars.

L’emprim da mars

Gea, jau admet: L’usit da Chalandamarz ma para mintg’onn in pau ester. Nagut per mal, ma sco Sursilvan na ma commova questa tradiziun simplamain betg. Tuttina speresch jau sa chapescha cun tutta forza che la buobanaglia engiadinaisa e surmirana haja success cun stgatschar l’enviern. E sche quai na reussescha betg, lura pon ins tuttina quintar mintg’onn cun bellas impressiuns. A la fin dals quints m’è Chalandamarz pia tuttina pli simpatic che tschaiver – perfin sco Sursilvan!

A revair e bun divertiment cun la Lectura Rumantscha!