Lectura Rumantscha

Il Chalandamarz expandescha

Na, en Surselva n’èsi anc betg propi uschè lunsch. Qua avain nus noss tschaiver per stgatschar l’enviern. Ma la tradiziun da Chalandamarz viva e sa derasa apparentamain pli e pli er ordaifer il territori tradiziunal. Dapi intgins onns vegn l’usit engiadinais e surmiran numnadamain era festivà en la diaspora. La finamira dals organisaturs è da dar vinavant als uffants la fevra per la cultura e lingua rumantscha. Da far quai en quella moda, na para dentant betg da plaschair a tuts.

In avegnir intschert

GEA u NA? – Quella dumonda fatschenta actualmain Svizras e Svizzers en vista da las votaziuns da dumengia, p.ex. en connex cun l’Iniziativa SRG SSR. Tar ina u l’auter procura la dumonda forsa per notgs senza sien. Sch’ins guarda però sur ils cunfins da la Svizra, èn nossas votaziuns mo piculezzas. L’exempel il pli actual è la guerra en l’Iran – in pajais turmentà dapi decennis da tirannia. Ma sco ch’il commerziant da tarpuns Maurus Cathomas da Breil raquinta, èsi er in pajais da gronda amicabladad.

Solen ruaus a Trun

La Casa d’attempads s. Martin a Trun ha procurà per agitaziun ils ultims onns. Da svaris interns, disditgas e reproschas tranter vischins han ins legì en las medias. La Casa s. Martin è stada in vair eldorado schurnalistic. Uss è quai apparentamain sa midà. I regia solen ruaus a Trun. E quai vul dir ch’ins po finalmain far la lavur sco ch’i s’auda ed era puspè promover e scolar glieud per las clamadas en il sectur da tgira.

Dal reminent offrescha la Lectura Rumantscha oz er in pau divertiment linguistic cun la columna da David Truttmann.

E sche quai na tanscha tuttina betg: Has ti gia ina giada ponderà da scriver or da tia regiun? Nus da la FMR tschertgain novas vuschs per laSurselva ed il Grischun Central. Qua chattas ti tut las infurmaziuns.

Nus ans legrain da tia annunzia. A revair!