Lectura Rumantscha

Art da martgadar

Diesch minutas – uschè ditg dovra pasta per esser al dente u in ov per esser cotg a dir. Ed uschè ditg dovra era Stefan Engler, il president dal Cussegl dals chantuns, per far in «deal». Almain quella giada èsi stà uschia. Era ses «deal» cun Pierre-André Page, il president dal Cussegl naziunal, da barattar duas tractandas – l’armada ed ils gieus olimpics 2038 – è stà al dente ed al sitg en be diesch minutas.

Art certifitgà

Certificats datti ina massa differents. Tuttina sun jau stà in pau stut ch’i dat – sper professiuns certifitgadas, vin certifitgà e chaschiel certifitgà – er art certifitgà. In tal art creescha numnadamain Judith Brennwald da Flond cun duvrar be material da la regiun per ses maletgs e sias sculpturas. E quai garantescha apunta il certificat dad Alpinavera. Sche ti vul pia savair co che quest art guarda ora, pos ti leger il rapport da la FMR u visitar l’hotel Ucliva a Vuorz – u far omadus.

Art nunusità

I na saja en mintga cas betg ina collecziun convenziunala, constatescha noss redactur Augustin Beeli areguard il nov disc cumpact Resonanzas dad Astrid Alexandre. Sin il nov album na chatt’ins numnadamain ni simplamain musica da consumar ni musica da saut. Na, i saja musica ch’ins sto tadlar attentamain e cun peda, uschia la chantautura sezza. Ella ha dal reminent lavurà quatter onns vi dal album che viva – sco che ses titel tradescha in pau – da resonanzas cun auters artists.

A revair e bun divertiment cun la Lectura Rumantscha!