Lectura Rumantscha

La Lectura Rumantscha va oz per vias e sendas, sfundrond en chavorgias ed en l’istorgia ed er in pau en debattas politicas.

La senda destruida che avra puspè

Jau na sun pertutgant viandar betg ina temelitga, ma ils maletgs da la senda tras la Clemgia suenter las malauras da l’onn 2017 (guarda foto) ma fan snuizi. Tut auter la situaziun ussa: Ina bella via e punts per part anc en fabricaziun che carmalan però da bainbaud visitar la chavorgia. Quasi diesch onns suenter las squassadas dals urizis vegn la chavorgia numnadamain puspè averta. Da sperar èsi che gronds urizis fetschian in grond caraun enturn la Clemgia, uschia che jau poss far in bel di ina visita en tutta quietezza en quella chavorgia sper Scuol.

La senda istorica

Tuttas vias mainan a Roma, era la Gassa Sontga Gada a Mustér. Almain manava ella en il temp medieval sco part da la Via Franciscana differents imperaturs sur il Lucmagn vers il sid fin Pavia. Oz è ella be in curt relict da quella lunga via, cun dretg e sanester mirs sitgs. Quels ed ils fundaments da la senda vegnan refatgs actualmain per che viandantas e forsa er imperaturs actuals na stoppian da plievgia betg passar tras puzs.

La senda tschorva

In’incumbensa dal deputà sursilvan Martin Sgier ed auters da ses e sias collegas da la PPS pretenda ch’il Chantun duai porscher dapertut la pussaivladad da pajar cun daner blut. – Quai custia memia bler e la dumonda da pajar cun munaida e bancnotas saja fitg pitschna, ha la Regenza respundì. Uschia pajan per exempel be anc 15 % da las scolaras e scolars da la Scola chantunala lur tschaveras cun daners bluts. Quai para pia dad esser ina senda tschorva per Martin Sgier.

La senda enavos

E sco adina vers la fin dal mais fa noss schefredactur in viadi enavos tras las lingias grassas e finas dal zercladur. Il Mais da pais ha chattà vias e sendas strategicas – e dat tscha e là ina piztgada sper senda.

Bun viadi cun la Lectura Rumantscha!