La vischnanca metta ora il tarpun per dischlocar

Il vitg grischun da Brinzauls ruschna aval dapi onns – ed el è adina puspè pertutgà da bovas. Gia pliras giadas han las abitantas ed ils abitants stuì bandunar lur dachasa perquai che la muntogna smanatschava.

Perquai è vegnì lantschà ils davos onns e mais in grond project da translocaziun. Abitantas ed abitants da Brinzauls han pudì s’annunziar en il rom da quest project per ina translocaziun preventiva. 42 partidas èn s’annunziadas, las qualas represchentan radund 95 abitaziuns primaras e secundaras.

Cun il credit brut dad 82,56 milliuns francs che la radunanza communala dad Albula/Alvra ha approvà gievgia saira vegnan cuvrids tut ils custs principals che stattan en connex cun quel project da dischlocaziun.

Chantun e Confederaziun pajan la gronda part

La fin dals quints na vegn dentant betg la vischnanca Albula/Alvra a stuair pajar la gronda part dals custs da passa 82 milliuns francs. Il Chantun e la Confederaziun sa participeschan cun 90 % als custs da translocaziun, ils ulteriurs 10 % ston las persunas che vulan translocar pajar sezzas. Il parlament grischun ha gia approvà il december 2025 ina contribuziun d’investiziun da 50 milliuns francs.

A la vischnanca Albula/Alvra restan – tenor las explicaziuns da gievgia saira dal president communal Daniel Albertin – sin il pli anc custs da 360 000 francs.

Daniel Albertin ha caracterisà il project sco unic en l’entira Svizra. Cun il project da dischlocaziun vegnia decidì davart il futur dal vitg. Ed el ha fatg valair: «Nus vulain mantegnair per tut quels e quellas che restan en il vitg in vitg ch’è degn da viver.»

La balla è ussa tar il Chantun

Suenter il GEA da la radunanza communala è ussa la balla tar la regenza grischuna. Era quella sto approvar il project. Tgi che vul suenter propi dischlocar, quel u quella sto lura inoltrar ses project concret al Chantun. Sche quel conceda la dumonda specifica, survegnan las persunas pertutgadas ina garanzia da l’indemnisaziun.

Tgi che vul far la midada, ha la schelta tranter trais differentas variantas. Las persunas pertutgadas pon ir a star en ina chasa existenta u en ina chasa nova entaifer ina zona da bajegiar legalmain valaivla insanua en il chantun Grischun. I dat dentant era la segunda varianta, numnadamain ch’ils pertutgads pudessan laschar pajar ora per il terren ed ils bajetgs ch’els vegnan a bandunar. E la finala pon abitantas ed abitants da Brinzauls era sa decider da tschertgar in nov dachasa en zonas da translocaziun che vegnan predefinidas sin il territori da la vischnanca Albula/Alvra.

La situaziun actuala è stabila

La situaziun en il vitg da Brinzauls è dentant sa stabilisada marcantamain ils mais passads. La raschun èn la gallaria da drenascha e las perfuraziuns en quella. Tras quellas lingias po aua sutterrana cular sut Brinzauls ora e calmar ferm la ruschnada dal vitg.

Dapi bunamain sis mais vivan puspè persunas en il vitg muntagnard, suenter ch’ellas avevan stuì bandunar lur dachasa pliras giadas durant plirs mais.

Ils custs totals per la dischlocaziun da Brinzauls pudessan la fin dals quints perquai er esser pli bass, perquai ch’intginas abitantas ed abitants sa decidan tuttina da restar en il vitg muntagnard. Ma er en l’avegnir na datti betg ina garanzia totala ch’i na dettia betg pli evacuaziuns.