Lectura Rumantscha

Gabriela Riedi/FMR, ils 16 da settember 2026

Il bass en il fund

Nossas duas carrieras musicalas han cumenzà tuttina: cun la flauta. Entant che mia via musicala è stada bainbaud a fin, è Rees Coray anc adina musicist cun corp ed olma. El ha però spert barattà la flauta cun il bass e cunterbass. Il bass saja per el la pasta, betg il zutger, di Rees Coray: Simplamain il fundament d’ina band. E tuts e tuttas che mangian gugent san che be sosa na gusta betg. I dovra la pasta.

E lura, datti tia scola anc? Quellas da Tarasp e Ftan pudessan numnadamain bainbaud serrar. La suprastanza communala da Scuol ha infurmà glindesdi saira davart quels plans. Resistenza è gia programmada. Gia a la saira d’infurmaziun n’èsi betg restà quiet. Blers e bleras han tegnì si il maun per s’exprimer.

Sia scola resta averta, però serra el ses chapitel sco pli aut scolast da la Surselva. Adrian Cathomas, scolast a Laax, chala suenter quatter onns sco president da la Conferenza Generala Surselva. El dat in sguard enavos, ma senza chattar ch’en il passà saja stà tut meglier.

PIA ha num la nova gidantra en la Chasa federala. Ella na fa dentant betg giu la pulvra u controllescha visitadras. I sa tracta numnadamain dal nov tool d’intelligenza artifiziala dals Servetschs parlamentars. Ma para na fan ils politichers grischuns (anc) betg diever dad ella, sco ch’els han tradì a l’ur da la sessiun.

A revair e bun divertiment cun la Lectura Rumantscha che vegnida scritta da l’intelligenza natirala!