«Eu less manar il cumün da Scuol sco ün impressari»
Als 15 november ha lö il seguond scrutin per la tscherna dal capo cumünal da Scuol. Il prüm candidat es cuntschaint: Beat Cantieni. El es tuornà in patria e voul surtour respunsabiltà cun tadlar, discuorrer e tour per mans ils problems.
Beat Cantieni ha annunzchà in venderdi passà sia candidatura pel seguond scrutin da l’elecziun sco capo cumünal da Scuol. Her marcurdi ha la presidenta cumünala in uffizi Aita Zanettai annunzchà da recandidar. Il Parti popular svizzer Engiadina Bassa preschainta hoz, in gövgia saira la persuna chi candidescha eir amo pel presidi da Scuol. Il seguond scrutin da l’elecziun dal capo cumünal da Scuol ha lö als 15 november. Sco prüm candidat declera Beat Cantieni sia motivaziun per sia candidatura.
Posta Ladina: Beat Cantieni, che es Sia motivaziun per candidar sco capo cumünal da Scuol i’l seguond scrutin?
Beat Cantieni: Eu candidesch causa la colliaziun cun mia patria, na per ambiziun politica. Eu less dar inavo alch a Scuol da quai ch’eu n’ha surgni quia. Perquai sun eu pront da m’ingaschar activamaing pel cumün.
Perche dess la populaziun da Scuol eleger ad El sco capo cumünal da Scuol?
Eu sun creschü sü a Ftan e Scuol e cugnuosch ils cumüns. A listess temp n’haja passantà ed imprais bler dadour l’Engiadina Bassa. Eu main cun mai tuots duos: la vicinanza da Scuol ed ün sguard d’utrò. Eu taidl, discuor e pigl per mans ils problems e sun pront da surtour respunsabiltà.
Che experienzas illa politica ha El ramassà fin uossa?
Eu sun stat duos ons illa cumischiun sindicatoria e 13 ons illa cumischiun da fabrica da Bever in Engiadin’Ota. Lapro n’haja vis co cha la lavur in ün cumün funcziuna e quant important chi’d es da manar insembel differentas opiniuns.
Chi es Beat Cantieni insomma?
Eu sun nat dal 1967 e creschü sü a Ftan ed a Scuol. Eu n’ha imprais disegnadur da construcziun bassa e mürader, am n’ha perfecziunà sco manader da fabrica e plü tard stübgià economia da gestiun e general management. Daspö passa 25 ons lavur eu in posiziuns da direcziun. Eu sun maridà e n’ha duos uffants creschüts.
Co es Sia vista actuala sül cumün da Scuol?
A Scuol es bler bun, e sün quai pudaina fabrichar sü. A listess temp sta il cumün davant dumondas difficilas. Eu chat cha nus douvran darcheu daplü quietezza e stabilità. Quai nu voul però dir cha tuot stopcha restar uschè sco chi es.
El viva o ha vivü fin uossa dadour l’Engiadina Bassa ed El ha forsa uschè üna vista ün pa externa sül cumün e sülla politica da Scuol. Es quai ün avantag?
Schi, da quai suna persvas. Eu sun collià cun Scuol, n’ha però eir vivü e lavurà blers ons dadour cumün. Perquai possa guardar tschertas dumondas sainza esser stat implichà quia o là. A mai esa important da tadlar il prüm e lura da tscherchar insembel soluziuns.
Che visiun ha El pel cumün da Scuol respectivamaing che voul El realisar a Scuol?
Eu less cha Scuol resta finanzialmaing san e possa eir in avegnir agir svess. La glieud chi viva quia dess avair bunas perspectivas. Quai grataja be scha las differentas fracziuns collavuran e schi dà darcheu daplü fiduzcha.
Che es Sia tenuta invers la serrada da las scoulas a Ftan e Tarasp?
Pro las scoulas nu das-chain nus simplamaing na congualar be ils cuosts. Nus stuvain verer che chi fa pedagogicamaing sen pels uffants e che consequenzas ch’üna serrada vess per Ftan e Tarasp. Natüralmaing stuvaina eir savair scha la soluziun es finanziabla a lunga vista.
Co vezza El la sfida finanziala dal cumün da Scuol?
Sco prüm am procuress eu üna survista exacta da las finanzas. Davo ston la suprastanza cumünala e l’administraziun decider insembel che chi’d es important ed ingio cha nus stuvain esser precauts. I va per cha Scuol haja eir in avegnir avuonda spazi.
Il cumün da Scuol vess dad investir bler ill’infrastructura, ma eir in progets turistics e da scoula. Che prioritats metta El pro las investiziuns?
Per mai vain il prüm l’infrastructura existenta. Nus stuvain tgnair in bun stadi quai cha nus vain. Davo vaja per investiziuns chi vegnan a favur da la glieud quia, per exaimpel sül chomp da scoula. Progets turistics sun importants, ston però manar alch a tuot il cumün.
Ün tema brisant es la revisiun da la planisaziun locala. Co voul El manar inavant quista fatschenda?
Pro la planisaziun locala stuvaina proceder giuridicamaing net e dir avertamaing che chi’d es planisà. La populaziun dess pudair incleger che chi’s müda per ella. E nus stuvain tour serius ils differents pissers, eir scha a la fin nu sun tuots da listess avis.
Che es Sia fermezza politica?
Eu taidl e di avertamaing quai ch’eu pens. Cur ch’üna decisiun es tratta, lessa eir chi capita alch. Lapro am vaja per chattar soluziuns culs partecipats invezza da discuorrer be sur da problems. Sco fingià manzunà nu less eu manar Scuol politicamaing, dimpersè sco ün impressari.
Co vezza El sias schanzas da gnir elet?
La populaziun decida sch’eu vegn elet o brich. Eu poss be muossar chi ch’eu sun e per che ch’eu stun. Finalmaing es la decisiun pro’ls votants e las votantas.
Gust da leger dapli?