Lectura Rumantscha
FMR
Era sche ti ed jau n’essan forsa betg pertutgads u pertutgadas da violenza a chasa, stuain era nus esser attents ed engaschads, sch’i avess da dar in cas da violenza en nossa vischinanza.
Cun campagnas cunter il tabu
Violenza da chasa po pertutgar nus tuts, sche betg direct, lura forsa en il circul d’enconuschents u en chasa da pliras famiglias. Tenor la statistica criminala èn vegnids registrads l’onn 2024 en Svizra radund 21 000 delicts, en il Grischun 232. E quai èn be ils cas ch’èn vegnids annunziads a la polizia. Madlaina Baselgia è responsabla dal post da coordinaziun cunter violenza a chasa dal chantun Grischun. Ella declera co che campagnas da prevenziun pon dissolver il tabu davart la tematica e schizunt encuraschar persunas pertutgadas da dumandar per agid.
L’ironia davart l’Ospital Samedan
Sch’il total da las vuschs fiss stà relevant en connex cun la finanziaziun transitorica da l’Ospital Samedan, lura n’avess quel credit betg fatg naufragi. Dumengia han approvà numnadamain las vischnancas da Puntraschigna, Samedan e S-chanf il credit. Quellas decisiuns eran entant be pro forma, perquai ch’igl avess duvrà in SCHI da tuttas vischnancas da l’Engiadin’Ota. Uschia vegn l’ospital gestiunà anc fin mars sco ussa. Suenter vegn la purschida reducida e l’ospital chantunal vegn a garantir il provediment da sanadad en l’Engiadin’Ota. Precis quai aveva la populaziun refusà en ina votaziun precedenta. Tge ironia!
Las duas legendas da Flem
Omadus en creschids si a Flem ed han status da legenda. Il junior fa sport, il senior porscha sport. La gievgia èn il freestyler Andri Ragettli ed il president da la Gruppa Arena Alva Reto Gurtner s’inscuntrads per in discurs moderà dad Annina Campell – natiralmain a Flem. Era sche las professiuns e vegliadetgnas èn differentas, datti sper la derivanza er autras parallelas, numnadamain da surpassar cunfins. «Be sche ti vas sin vias novas, porta quai vinavant tai», di Andri Ragettli. E Reto Gurtner manegia: «Sco interprendider stos ti empruvar d’esser ordavant a tschels.»
A revair e bun divertiment cun la Lectura Rumantscha!
Gust da leger dapli?