Lectura Rumantscha

In cussegl confidenzial

Aczias da Nvidia u Apple fan furora e van da tetg ora. Ma daco ir lunsch a la tschertga dad aczias, sch’i dat er en il Grischun ina schliaziun? Ils scrits da participaziun da la Banca chantunala Grischuna èn numnadamain en ina hausse, sco ch’ils bursians din. Uss è mes vocabulari en quest connex gia a la fin. Sche quai è er il cas tar tai, è l’artitgel da Claudia Cadruvi gist l’endretga lectura.

Il sport per la sibiria

Giugar cun temperaturas fin a minus 20 grads a tschoccas – nagut per mai. Tuttina èsi interessant d’emprender d’enconuscher quel sport or da la distanza tar agreablas temperaturas en chasa. Trair a tschoccas saja sumegliant al curling u al gieu da boccia, scriva noss redactur Dario Müller. El ha fatg visita ad ina partida da tschoccas a Sur En tar «be» minus 6 grads. Ma eba, i po era reger ina sibiria, sco ch’ils commembers dal club da tschoccas «ES Sur En» han tradì cun in surrir.

Betg dapli accidents sin pista

Da Nadal e Bumaun hai jau gì l’impressiun da trasora puspè udir dad accidents grevs sin pista en il Grischun. Qua ina snowboardista grevblessada, là in skiunz mort. Quella impressiun persunala è dentant faussa, sco che la retschertga tar las pendicularas e la polizia en Surselva mussa. Ils accidents èn restads en la media dals davos onns. Luca Degonda, il schef da la Polizia chantunala alpina cusseglia tuttina: «Ir cun skis sin pistas stretgas cun pauca naiv fa vegnir stanchel. Perquai meglier prender la pendiculara per ir il davos tschancun giu en la val.»

A revair e bun divertiment cun la Lectura Rumantscha!