Lectura Rumantscha

Sche Voltaren na tanscha betg

Tener ad aut, sfradentar e sfruschar si ina buna purziun Voltaren Dolo – uschia tract jau dolurs als pes e probablamain blers auters sportists amaturs era. Ma tge far, sche la tuba Voltaren na gida betg? En il mender cas – e quai vul dir propi il mender cas – pon ins s’annunziar tar Silvan Beeler. El è chirurg spezialisà da pes en il Balgrist e tracta quels che ni Voltaren ni insumma in’autra clinica na sa tractar. E quai era per rumantsch.

Sche la naiv na tanscha betg

Naiv e naiv, tut la plaiv, è da naiv curclada … Gea, sch’i mo fiss uschia sco en la poesia «Unviern» dal poet Gion Cadieli. Actualmain cumbatt’ins numnadamain dretg e sanester cun la mancanza da naiv e senza quella artifiziala na giessi betg. Quai vala era per la loipa a Trun, nua ch’ins resta però optimistic. Ins analiseschia ed optimeschia d’enviern tar enviern. Ma forsa fissi plitost dad urar: «Chanuns da naiv, ils quals che vus essas sper loipa, nossa naiv artifiziala da mintgadi dai a nus oz, …!»

Sche l’esoteric na tanscha betg

Falera vul far ina fin cun supposiziuns esotericas ed astrologicas – almain sin la Mutta. Quest crest preistoric a l’ur dal vitg è ditg stà in lieu da forza e cults dal temp da bronz. Quai duai ussa dentant far plazza a fatgs archeologics cumprovads. Tals èn dacurt vegnids publitgads en l’annuari «Archäologie Graubünden 6». Tgi che ha dapli interess per ficziun che per fatgs preistorics, po entant anc adina crair tge ch’el vul, esoteric, astrologic u tge -ic er adina. Fertic.

Dal rest reflectescha Patricia Tschuor-Marques sur dals sientamauns en cuschina.

A revair e bun divertiment cun la Lectura Rumantscha!