Lectura Rumantscha

Renovar il heliport a Samedan

Es ti era schon stà dasperas, cura ch’in helicopter è sa tschentà? Lura sas ti: In ventatsch ta sufla en fatscha, la pulvra turniclescha enturn e tia frisura è futsch. La pli auta e veglia basa da la Rega en Svizra duvrass urgentamain ina nova frisura, vul dir ina renovaziun. Il venderdi passà ha la Rega survegnì la lubientscha da bajegiar ses heliport a Samedan. Però in ventatsch pudess tuttina anc suflar encunter al project da plirs milliuns: Sche la Dretgira federala decidess che la votaziun davart la plazza aviatica da l’atun passà na saja betg valaivla.

Gratuit durant sepulturas

Has ti bregia da parcar tes auto? Stos ti era guardar dretg e sanester pliras giadas enfin che ti es mez-sturn? Discussiuns mez sturnas hai era dà las davosas emnas pervi da l’urden da parcar da la vischnanca dad Ilanz/Glion – surtut pervi d’ina petiziun. Al mument datti en mintga fracziun in auter reglament. Il venderdi passà ha la suprastanza infurmà davart il nov urden «armonisà» che vala en futur per tuttas e tuts. Ina da las reglas: Durant sepulturas pon ins parcar gratuit. E sche ti vulessas savair, sch’ins po era pajar cun daners bluts ils parcadis a Glion, lura legia l’artitgel da Martin Gabriel.

Ina Bernaisa per il presidi d’Albula/Alvra

Daniel Albertin, il president actual da la vischnanca Albula/Alvra po esser levgià. Dapi sempitern bunamain è el a la tschertga d’ina successura u d’in successur per ses uffizi presidial. Ussa datti moviment. A l’ultima radunanza è Manuela Gebert dad Alvagni Bogn sa preschentada sco candidata. L’advocata bernaisa mettess sia advocatura «sin flomma da spargn» per surprender l’uffizi.