Lectura Rumantscha

Sgrafits vi da fatschadas han gia tuts e tuttas vesì. Ils objects in pau pli spezials per muments pli spezials da la Lectura Rumantscha, probablamain betg. Als ins vegnan ils sgrafits a far plaschair, a las autras forsa ils objects spezials, mai ha la cumbinaziun fatg rir.

In’exposiziun per rumper il glatsch

Bleras chasas engiadinaisas han sgrafits. Sche era dildos da l’interpresa engiadinaisa «Manufucktura» tutgan tar bleras chasas engiadinaisas? Para betg, perquai vul l’interpresa tschertgar dapli il contact cun ils indigens e las indigenas. Uschia mussa ina nova exposiziun a Sent dildos pitturads artisticamain sper faziels cun motivs da sgrafit ed autras ovras d’art. Mes cussegl per rumper anc dapli il glatsch: motivs da sgrafits sin ils dildos.

Flurin Camenisch prenda cumià dals fastizs

El è il maister dals fastizs, ma betg pli ditg. Flurin Camenisch, zoolog e pedagog dal Museum da la natira dal Grischun, va la fin d’avrigl en pensiun. 35 onns ha el persequità cun uffants e creschids ils fastizs dad urs, luf, tschierv e vulp e tut tschels animals che vivan en il Grischun. Flurin Camenisch dat in sguard enavos sin ses fastizs.

Alleluia –  Zuoz ha revedì la planisaziun locala

La benedicziun da suren manca anc. Betg da suren dal tut, mabain dal Chantun. Ma lura fiss il project da mamut da la nova planisaziun locala da Zuoz finì. Set onns hai duvrà fin tar quel pass. Tut è gartegià senza gronds obstachels, la radunanza ha ditg unanimamain GEA. Forsa ha tuttina insatgi da suren dal tut giu en la detta a Zuoz, surtut sch’ins cumpareglia cun autras vischnancas che battan cun lur planisaziuns localas.

Campar amez la naiv a Rueras

Pernottar d’enviern sin 1400 meters sur mar sin in campadi? A mai va gist la schelira tras pel ed ossa, ma para ch’i dat persunas che fan quai. 1300 pernottaziuns ha il Campadi Rein a Rueras en Val Tujetsch notà l’onn passà d’enviern. Ed era la stad ha il campadi fatg bella figura cun in augment. Ussa prenda il campadi en mira d’extender l’infrastructura, forsa per anc dapli pernottaziuns en la naiv.

A revair e bun divertiment cun la Lectura Rumantscha!