Lectura Rumantscha

Pasca vegn adina pli datiers. Cun las lieurs da tschigulatta ed ils ovs colurads vegnan però era las colonnas dad autos en il Grischun. Enstagl da star en schanuglias en baselgia van blers da Pasca en il sid a star a sulegl. E quai na plascha betg als da Domat.

Reservà per quels da Domat

Da Pasca survegnan ils ovs in pau colur ed a Domat uss er ina via. La lingia blaua, ina via communala a Domat ch’era fin ussa betg autorisada per il traffic motorisà, duai pussibilitar ad indigenas ed indigens da guntgir cun lur autos il traffic da Pasca. Sur ils firads da primavaira staupa numnadamain adina puspè il traffic da transit las vias dal vitg.

Ina Val Müstair reactiva ubain proactiva

Reactiv ubain proactiv? – I na va betg per politica u sport, mabain per la midada dal clima. La scienziada Elena Siegrist ha realisà scenaris co che la Val Müstair sa preschentass l’onn 2050, sch’ella na faschess insumma nagut cunter il stgaudament dal clima e sch’ella vegniss activa. Il facit da la doctoranda: «La Val Müstair ha in grond potenzial da cumbatter a moda proactiva la midada dal clima.»

Nagin nov hotel a Murschetg

In hotel da 40 fin 45 milliuns francs era planisà a Murschetg. La vischnanca burgaisa da Laax avess dà il dretg da construcziun per sia parcella e l’interpresa Fortimo Group avess realisà il project. Quella interpresa sa retira ussa dentant, perquai ch’ils recurrents cunter il project han gì success.

La FMR tschertga redactur:as per la Surselva ed il Grischun Central. Has ti forsa veglia da vegnir e lavurar cun mai e tut la squadra redacziunala? U sas ti dad insatgi che pudess avair interess? Qua chattas ti tut las infurmaziuns che ti pos sa chapescha era trametter vinavant! E dal rest gist er anc in columna dal schefredactur da la FMR en quest connex.

A revair e bun divertiment cun la Lectura Rumantscha!