Lectura Rumantscha

Il bonus va a perder

Il Grischun va sin ils frains e vul stritgar il bonus sin la taglia da traffic per vehichels electrics. Ina franada totala n’èsi dentant betg. Anc fin l’onn 2035 duain possessuras e possessurs d’autos, camiuns e töfs electrics profitar. Suenter na fai nagina differenza pli, sche quels sumsumeschan u schluppegian – uschia la proposta da la Regenza che tema uschiglio ina fora pli gronda en la cassa statala. Sco proxim tracta il Cussegl grond la fatschenta.

Ina spassegiada da 1200 kilometers

Spassegiar n’è per il pli betg spectacular, almain per persunas nullotgquindesch sco jau. Che spassegiar po esser dapli che be guardar in pau per la cuntrada, quai mussa dentant Donat Caduff cun sia nova exposiziun en la Cularta a Laax. L’artist oriund da Sagogn expona cun «Observaziun obsessivas» numerusas ovras ch’el ha creà cun spassegiar a Roma, Paris e Flem/Laax – en tut haja el fatg 1200 kilometers per obtegnair ses motivs.

L’expert da frisuras

E sur da tge discurras ti cun tes coiffeur u coiffeusa? Forsa da l’aura u la lavur? – Jau preferesch per il pli da laschar far l’experta u l’expert da frisuras sia lavur e da taschair. E damai na fiss jau era betg exnum in bun client per Daniel Schgör. Il coiffeur da Müstair tschantscha numnadamain gugent durant la lavur, il pli gugent sur da chatscha, sport e politica – e quai dapi var 40 onns.

A revair e bun divertiment cun la Lectura Rumantscha!