Lectura rumantscha

A Lantsch be rumantsch

Cotschen, blau, violet, verd, mellen, rosa, oransch…la glista fiss anc lunga. Ed ils uffants da Lantsch emprendan questas colurs – per rumantsch. En la promoziun linguistica prescolara da Fabienne Zähner vegnan ils pitschens en contact cun il vocabulari elementar surmiran. L’idea: Ils uffants duaian udir bler la lingua – avant che els van en scolina. Per Lantsch, nua che be in terz da la populaziun discurra rumantsch, è quai ina purschida bainfrequentada.

Il president da la primavaira

Sche il president da vischnanca è absent, sto il «vice» siglir en. Quai è stà il cas ad Ilanz/Glion. Martin Capeder ha durant ils ultims dus mais tgamunà la vischnanca da radund 5000 abitantas ed abitants e 13 fracziuns. Ed il «timing» da surprender il post è stà super, sco che Martin Capeder ha ditg en l’intervista: «Damai che jau lavur l’enviern sco scolast da skis e la stad sco scrinari è il temp da primavaira stà ideal per mai da surprender». 

In «crimi» sur Breil

Atgnamain n’èsi nagut «spectacular»: In’ulteriura ustaria en Surselva è venala. Il «Burleun» – amez il territori da skis da Breil sin spunda sulegliva – è serrà e scrit ora per la vendita. Pli «speziala» è dentant la preistorgia dal vendider da l’ustaria, in um da fatschenta oriund dal chantun Berna. La Dretgira penala economica da Berna aveva l’onn 2024 condemnà el pervia da cugliunaria professiunala e falsificaziun da documents.

Bun cumenzament da l’emna cun la Lectura Rumantscha!