Lectura rumantscha

Ils temps sa midan d’in cuntin. Quai pon u ston er ils protagonists da la Lectura Rumantscha constatar.

Memia paucs pops

Ch’ils temps sa midan, quai fa rumpatesta als ospitals da la periferia. Sper auters problems mancan oravant tut ils pops. Ad onn naschan en il Grischun var 1500 uffants ed ils blers a Cuira. En ils ulteriurs tschintg ospitals cun staziun da parturir entant pli e pli paucs. En sia directiva da sanadad recumonda il chantun damai da serrar duas da quellas staziuns – a Glion ed a Tavau.

A Trun va in’èra a fin

Il svilup permanent senta era la fatschenta Albin SA a Trun. Durant 75 onns han ils Albins servì lur clientella cun far transports en ospital, transports da purschels, transports da rument e dapi 1986 cun furnir bavrondas e vin. Ma ussa va lur èra a fin. Ils temps sajan sa midads, ins vendia pli pauc ed i saja il dretg mument da serrar la fatschenta.

Anniversari a Breil

Pertutgada dal passar dal temp è era la plazza da golf a Breil. Quella po gia festivar ses 20avel anniversari e survegn sco regal ina nova cumparsa: in nov logo, ina nova pagina d’internet, ed in nov motto – famigliar e pacific. Anc betg sa midà è però il dumber da rusnas. La plazza cun 18 rusnas resta dentant in siemi a Breil.

Apropos anniversari: L’Uniun da teater Sagogn ha festivà l’onn passà ses 20avel e celebrescha quai cun ina nova inscenaziun: «In asen per Tello».

A revair e bun divertiment cun la Lectura Rumantscha!