Lectura rumantscha

Temp da stad è temp da viadi. Perquai pos ti far oz cun la Lectura Rumantscha in veritabel viadi tras l’entir Grischun cun quatter stops. Tut è gratuit, segir, gustus e panoramic. Empermess!

Stop 1: art en Val Müstair

Il viadi entschaiva per tai en la pli bella val grischuna, la Val Müstair! (Perstgisa, ma ina smieula patriotissem è bain lubì!) Gist tschintg differents «museums» sa mettan ensemen en la val perifera durant questa stad per mussar sut il chavazzin iper-jauer «plomer plajer culer» in’exposiziun che lavura cun differentas texturas. Per exempel lascha in’artista cular stoffa giu dad ina stgala.

Stop 2: las «muntanellas» da Hannibal

Da la Val Müstair vegn jau cun tai sur il Pass dal Güglia. Sisum quel pass pos ti far enconuschientscha d’ina gronda figura or da l’antica, il general Hannibal. Geabain, quai è quel dals elefants. Giovanni Netzer, la testa fina davos l’instituziun culturala Origen, inscenescha gugent e savens persunalitads istoricas. Sin il Güglia lascha el ussa sautar il grond Hannibal ensemen cun «muntanellas» – e betg cun elefants.

Stop 3: il stradun tranter Laax e Schluein

Ensemen fatsch jau lura cun tai il viadi sin in tschancun da la via chantunala ch’ha normalmain bler traffic: il traject tranter Laax e Schluein. Sin quel stradun cun diversas stortas capitan detg savens accidents, sco p.ex. l’emna passada. Perquai ha noss redactur dumandà tar la Polizia chantunala: È quai insumma in traject neuralgic e duvrassi mesiras? La resposta uffiziala: na.

Stop 4: in salsiz a Glion

Damai che ti ed jau avain cuntanschì saun e salv la Foppa en Surselva, datti insatge da piclar: chaschiel, mel d’avieuls, salsiz, tuargia, ovs, sirup … – Tuna bain, ha? La fiera emnila da Glion porscha tut quel sortiment dapi exact 30 onns.

Bun appetit e bun divertiment!