Lectura Rumantscha

Igl è fitg chaud. Ma la Lectura Rumantscha metta anc in dus fessels en il fieu per che la burnida restia temprada cun intginas istorgias «chaudas».

In glatsch en las chaliras

Da stuair vuschar en questas chalurs davart ina plazza da glatsch artifiziala, quai è atgnamain anc flot. Votantas e votants da Mustér pon far quai questa dumengia. I va per in credit dad 1,11 milliuns francs per sanar la patinera fraida che fa suar. Il cussegl da vischnanca ha numnadamain refusà la sanaziun. In’iniziativa vul però far chommas (cun vidlonder patins) a la vischnanca.

In fier chaud – il spazi d’abitar

Sche ti ed jau stuessan numnar in semperverd politic dals ultims  onns, lura è quai il spazi d’abitar. Surtut quel per indigens. Memia bleras abitaziuns èn vegnidas «striunadas» ils davos onns en abitaziuns secundaras. Il semperverd survegn uss ina sbrinzla dapli a Scuol. La suprastanza ha numnadamain decis d’abolir la pussaivladad da transfurmar en las fracziuns da Scuol e Ftan emprimas abitaziuns (tenor dretg communal) en segundas abitaziuns. Tuna cumplitgà? Noss redactur declera co e daco.

Il cumbat è anc temprà

Tge pensas ti? Pudess il cumbat electoral per il presidi communal dad Ilanz/Glion anc vegnir pli chaud? Per la successiun da Marcus Beer – che vegn a chalar sin la fin da quest onn – è il cumbat electoral anc detg temprà. I va gea anc in mument, l’elecziun è pir la fin da settember 2026. Il vicepresident ha entant però inoltrà sia candidatura: Martin Capeder da Duin.

Ils chaus cotschens pervi da la carta cotschna

Ha la carta cotschna dal giugadur american Folarin Balogun era procurà tar tai per in chau cotschen, sco tar Donald Trump? Has ti era telefonà a Gianni Infantino da la FIFA? Sche betg, lura stos ti leger la glossa da Patrícia Tschuor-Marques. Ella propona in update da la carta.

Pia cussegliain nus blera coolness e paucas cartas cotsch­nas legend la Lectura Rumantscha!