Lectura Rumantscha

L’emna è ida a finir cun ina trumpada. Ina duscha fraida. Ina carta cotschna. – La Svizra ha pers cunter l’Argentina en il quartfinal dal Campiunadi mundial da ballape. I na va betg pli a far ir enavos … – E perquai t’offresch jau quatter istorgias per guardar enavant cun schlantsch sin ina nova emna.

Trair pli lev il flad a Brinzauls

Ils da Brinzauls pon definitivamain trair pli lev il flad. Per l’ina ha la situaziun en lur vitg sa calmada grazia a las drenaschas sut lur chasas. Il fund sut Brinzauls na ruschna betg pli uschè ferm. E tuttina vulan bleras abitantas ed abitants bandunar il vitg e «dischlocar preventivamain» en in auter lieu. Gievgia saira ha la radunanza communala dad Albula/Albula, sut il presidi da Daniel Albertin, avert la spina per finanziar quella dischlocaziun.

Mustér brama in refrestg

Jau sai, igl è in’analisa curaschusa. Ma jau sun persvas che las temperaturas chaudas han motivà las votantas ed ils votants da Mustér da dir GEA a lur plazza da glatsch artifiziala. Il GEA a l’iniziativa per la patinera, ma era la buna participaziun a l’urna (46,7 %), sa laschan declerar cun las chalurs: Tut che brama in refrestg.

L’analisa suenter il matsch

Suenter il gieu è avant il gieu. Igl è dad analisar per optimar tut per in proxim gieu u campiunadi. Perquai cussegliass jau als giugadurs da la squadra naziunala da tadlar il podcast dals dus Sursilvans Joris Tomaschett e Martin Schär da l’Uniun Sportiva Rueun. En lur podcast «Denter ballapei e meisa rodunda» prendan els dapart il sport dals sports – or da la chasa da lur club!

Co pumpar in camper en l’Australia?

Ma sche ti es definitivamain unfis da tut quest circus da ballape, lura ans occupain nus ussa da las chaussas impurtantas sin quest mund. Per exempel: Co èsi da pumpar en l’Australia il pneu dad in camper? Gnanc uschè simpel da respunder, sco che noss columnist ha stuì sentir …

Jau giavisch bunas analisas, flots refrestgs e surtut bunas pumpas per dar schlantsch a l’emna!