Lectura Rumantscha

Oz drizza la lectura dal di la glisch dals reflecturs sin persunas davos las culissas da la Street Parade, da la «Revolta ella Cadi» e d’ina nova app rumantscha.

Per la festa gronda

Radund in milliun persunas sa divertescha mintg’onn a la Street Parade a Turitg fin a l’extasa. Per che quellas possian far festa, ston auters dentant lavurar – sco per exempel Marco Albertin. El è responsabel per passa 120 stans da mangiativas ed autra rauba sco chapels ed egliers da sulegl. Sez na possia el perquai betg ir a far il raven. «Vollgas» dettia el mo davos las culissas.

Per l’infrastructura

Davos las culissas è er Ursin Venzin s’engaschà ils ultims dis, quai per ina «Revolta». Sper la claustra da Mustér ha el tschentà si cun numerus gidanters il palc per il drama «1799 – Revolta ella Cadi» da Hubert Giger che ha premiera ils 7 d’avust. Lura mida Ursin Venzin dentant rolla. L’inschigner da construcziun gioga numnadamain sin «ses» palc in schuldà franzos.

Per la lingua

Per scriver in pled sco «chautschas» ston ins tippar diesch giadas sin il telefonin. Anc bler dapli sch’ins sto tippar insatge sco «Jau hai emblidà mias chautschas a chasa». Quai dovra temps, cunzunt sch’ins vul scriver correct. Grazia a la nova app ClaviRom per Android daventa il scriver sin il telefonin dentant pli simpel. Durant tippar propona quella ils pleds cunvegnents. Quest gidonter da scriver rumantsch ha dal reminent Martin Huber da Dardin sviluppà. E quai na saja gnanc stà uschè cumplitgà.

A revair e bun divertiment cun la Lectura Rumantscha!