Lectura Rumantscha

Bun di a la lectura dal di cun acturas ed acturs pitschens e gronds!

Chaliras e sitgiras

Finalmain! – Ier gievgia han las temperaturas da l’unda da chalira actuala cuntanschì lur zenit. Ussa duai daventar in pauet pli frestg. Ma tuttina resta la situaziun precara pervia da la mancanza da plievgia ed il privel da fieu, cunzunt en vista dal 1. d’avust. Pertge garantì n’èsi betg che tuts suondian als scumonds da far fieu chantunal e communals. Preparativas particularas per questa fin d’emna n’han ils pumpiers en Surselva dentant betg fatg. «Nus essan adina semtgai», ha il cumandant dals Pumpiers Sursassiala Gion Tenner da Mustér sincerà.

Las acturas e l’actur da damaun

Far teater è en moda en Surselva. Tranter auter ha l’asen da Tello divertì dacurt il public a Sagogn, si Mustér festivescha la «Revolta» prest sia premiera e proxim onn èsi planisà in teater en il liber dals «Libers da Laax». Ma adatg, en la sumbriva dals gronds fan era pli pitschnas e pitschens teater, sco apunta quest’emna a Trun. Qua ha ina gruppa da set mattatschas ed in mattatsch frequentà in curs da teater tar Angela Collenberg. Las scenas ch’els han sviluppà ils ultims dis èn dal reminent da vesair la fin d’avust sco part dal festival Dapertut a Trun.

Tranter Den Haag e Cunter

Fisicamain passenta Corinne Cicéron Bühler il bler temp en ils Pajais Bass. Ella è ambassadura svizra a Den Haag. En ils patratgs sco era sin il palpiri è ella però era da chasa en il Grischun. La dunna ch’è creschida si en il chantun Vad è numnadamain burgaisa da Surses ed ha passentà bleras vacanzas sco uffant ma era sco creschida a Cunter. E perquai po l’ambassadura era dir che maluns, capuns, turtas da nuschs e l’istorgia da l’Ursin da la plumpa l’èn restads en buna memoria.

Bun divertiment cun la Lectura Rumantscha e la sonda ina bella festa naziunala!