Lectura rumantscha

David Truttmann/FMR, ils 26 d’avust 2026

Oz vai en la Lectura Rumantscha per la vita – da la bell’entschatta fin a la trista fin. Quai tuna da bler, navair? Ma jau emprov:

Las emprimas bargidas sursilvanas

Nua es ti naschì? En tge ospital? – Atgnamain èsi curius, nus umans n’ans regurdain betg dal mument e dal lieu, nua che nus essan naschids. E tuttina para tut quai da svegliar emoziuns, sch’i va per la dumonda, sch’in ospital duai serrar sia partiziun da naschientschas. Actualmain dat quella dumonda da discutar en Surselva. Ma apparentamain fan ils poppins sursilvans er en avegnir lur emprimas bargidas a Glion.

Emprovas er ti da restar fit durant tia vita, p.ex. cun far sport? Per dir la vardad hai jau tralaschà ils davos onns in sport che jau fascheva pli savens avant onns: ir cun bike. Il Bike-Maraton dal Parc Naziunal n’hai jau però mai fatg. Tar l’emprima ediziun dal 2002 hai jau dà ora bavrondas. Quai è tut. Questa sonda è gia la 25avla ediziun da la cursa enturn il parc. Duas dunnas èn engaschadas dapi l’emprima ediziun. Ed ellas sa regordan surtut dad ina ediziun ch’era ida a finir en in pitschen desaster, quella dal 2011.

La gronda part da nossa vita passentain ti ed jau probablamain en las atgnas quatter paraids. Ma en tge chasa abiteschas ti? En ina chasa nova u veglia? – Mintgatant n’èsi gnanc uschè simpel d’eruir la vegliadetgna da l’agen dachasa. Quai mussa l’exempel actual da Mustér. Là sa dumonda il servetsch archeologic quant vegl ch’in bajetg a la Via Cavardiras è insumma. Èsi forsa perfin la pli veglia chasa profana dal Grischun? Ed il servetsch archeologic n’è betg mo activ a Mustér. Er a Riom sto el respunder ina dumonda istorica.

La trista disgrazia al Piz Cengalo è era mardi vegnida tematisada davant dretgira a Puntraschigna. Datti culpants per la mort da las otg viandantas e viandants en la Val Bondasca, suenter la bova da la fin d’avust 2017? La dumonda è spinusa e pudess avair consequenzas era per autras vischnancas muntagnardas.