Lectura Rumantscha

800 onns istorgia

Sch’in alien sgulass sur il Surses, lura sa tschentass el pli probabel tar il chastè da Riom. Quel bajetg imposant dal temp medieval è numnadamain da vesair da lunsch. Actualmain vegn el sanà e renovà – per ils proxims 800 onns! Ier mardi ha l’intendant d’Origen Giovanni Netzer envidà ad ina conferenza da medias. 

Mesirar peschs a Tavanasa

Avant intgins onns hai jau fatg la patenta dad ir a pestgar. Uras a la lunga hai jau smanà la pertga en il Rain – senza success. Jau sun savens ma dumandà: Pertge vom jau atgnamain a pestga, sch’igl ha strusch peschs – u na sun jau simplamain betg abel? Ussa conferma dentant er in studi: ils ultims diesch onns è la quantitad da peschs en il Rain Anteriur sa reducida per 60 %. Il WWF ed l’Uffizi da pestga chantunal han infurmà l’ultima dumengia a Tavanasa.

Sentupada patgifica a Basilea

Enconuschas ti l’UCRBC? Quai n’è betg in club da ballape u ina partida politica, mabain l’Uniun cultura rumantscha Basilea e conturn. Mintga mais sa raduna ina pluna Rumantschas e Rumantschs che vivan a Basilea – per excursiuns, dar troccas e simplamain per dar ina baterlada. A l’ultima sentupada è la redactura Dorathe Schindelholz-Dolf era stada da la partida. Ses facit: Igl è stà paschaivel – en il vair senn dal pled!

Bun divertiment cun la Lectura Rumantscha!