Lectura Rumantscha

Oz giain nus suenter a noss nas e savurain odurs da terra e da guaud e schizunt da quellas magicas da trols e nanins.

La savur da terratsch e pastg che fa viagiar

Mintgatant chatta mes nas a chasa in’odur fitg captivanta. Igl è quella savur zunt enconuschenta da terratsch e pastg gist segà. L’emprim hai jau anc pensà daco che quai savura en abitaziun uschia. Uss èsi mintgamai in viadi olfactoric sin il plaz da ballape, nua che mes uffants èn stads cun lur chalzers. Quella odur vegn segir er a sa rasar a chasa tar las soras Anna Lea e Ladina Cabernard. Il plaz da ballape è quasi il segund dachasa da las giuvnas da Glion che fan mintga emna kilometers per dar ballape a Cuira ed a Son Gagl.

In lain cumplettamain svizzer

Ina odur tut aparti accumpogna era di per di Enrico Uffer. Schegea ch’el conceda da gnanc pli savurar uschè conscientamain la laina en sia resgia en Surses. El è persvas dal lain sco materia da construcziun e vul perquai lantschar ina chadaina da producziun cumplettamain en Svizra. Il futur vegn a mussar, sch’el ha gì in bun nas cun quella idea.

Il chastè e sias istorgias magicas

Jau na sai betg co che nanins, trols e strias savuran. Ma forsa ma gida il nov cudesch d’uffants «Il chastè magic» da Viola Cadruvi d’imaginar cun Edvina, Lexi e Merlin las odurs dal mund da las paraulas. I savura segir in zichel da notg fraida cler stailida e forsa era da pastg e laina.

A revair e bun divertiment cun la Lectura Rumantscha!