Votaziun

In «pro» ed in «pro»

Ils 30 da november decida il suveran grischun davart l’iniziativa da la PPS da stritgar las rentas actualas per vita duranta ad anteriurs commembers da la Regenza. Encunter quest’iniziativa datti ina cuntraproposta che vul limitar la pensiun sin trais onns. La FMR rasa ora ils arguments – però betg cun in «pro e contra», mabain en quest cas cun in «pro e pro», a favur da l’iniziativa ubain a favur da la cuntraproposta.

FMR, ils 20 da november 2025

Tgi che sorta da la regenza grischuna, quel u quella survegn ina renta per vita duranta. Quella sa drizza tenor ils onns en uffizi, importa dentant maximalmain 115 000 francs per onn. Cunter questa «pensiun guvernativa» ha la Partida populara svizra dal Grischun (PPS) inoltrà in’iniziativa che vul abolir dal tuttafatg quellas rentas. Sche l’iniziativa vegniss approvada en la votaziun chantunala dals 30 da november 2025, lura spargnass il Grischun en avegnir var 1,3 milliuns francs per onn.

Pajar anc durant trais onns

Il Cussegl grond è dentant cunter quest’iniziativa. Perquai ha il parlament chantunal elavurà ina cuntraproposta. Bain vul er il parlament chantunal abolir la renta per vita duranta. Tenor la cuntraproposta duessi dentant dar ina prestaziun transitorica da maximalmain trais onns. Sche la cuntraproposta vegniss approvada, lura avess il Chantun da spender enturn 1,15 milliuns francs pli pauc per onn che actualmain.

Las dus opiniuns

Tge pleda atgnamain per l’iniziativa da la PPS e tge pleda per la cuntraproposta dal Cussegl grond? – La redacziun da la FMR metta in sper l’auter duas opiniuns cun in «pro e pro».

Sa chapescha dessi anc la terza opiniun, quella da laschar las pensiuns guvernativas sco fin qua. Quella posiziun na vegn dentant betg resguardada en questa debatta d’opiniuns, era perquai che en las debattas politicas dals davos mais n’hai betg dà vuschs che vulessan mantegnair la pratica dad oz.