Lectura Rumantscha

Da chapitel a chapitel – cun la ­Lectura Rumantscha dad oz.

In nov chapitel

Salouf po festivar! Grazia a l’iniziativa dad in pèr dunnas datti puspè ina «buteia» en il vitg surmiran. Quella ha avert set dis durant 24 uras, sumegliant ad in model existent entadim la Lumnezia. «Vignogn ans ha dà segirtad», ha ditg en quest connex il president da la Societad Cooperativa Pro Salouf, Gian Sonder. Ina ventgina da persunas è il venderdi s’entupada en la butia a Salouf per far cumissiuns communablas.

Ina vusch en chapitel

Dapli aua = dapli producziun d’energia. Tenor questa simpla furmla han las Ovras idraulicas Zervreila inoltrà il venderdi passà in project per tschiffar aua en la Lumnezia per manar quella en il lai da Zervreila. Custs dal project: Var 140 milliuns francs. Avant varga diesch onns èri gia vegnì discurrì da quest project. Lura avevan las organisaziuns per la protecziun da la natira dentant recurrì cun success. Sch’ellas han era questa giada ina vusch en chapitel, vegn a sa mussar enfin ils 20 da favrer 2026.

Blers chapitels e sutchapitels

Laura Pfister è dapi quatter onns vi da scriver sia dissertaziun. Perquai èsi gia ussa cler, che quella lavur vegn ad avair blers chapitels, sutchapitels e forsa era sut-sut-chapitels. La doctoranda rumantscha è sa deditgada a la litteratura grischuna trilingua dal temp suenter la Segunda Guerra mundiala. Las tematicas ch’èn lura per part stadas actualas fatschentan er anc oz: mancanza dad abitaziuns, conflicts en famiglia e malchapientschas tranter generaziuns. Clicca qua sche ti vul savair dapli!

Buna lectura – da la Lectura Rumantscha!