Lectura rumantscha

Oz vai per las vatgas da latg da Zernez, Medel e Surses. Buna lectura!

Mulscher quei che va

Il tschains d’aua èn l’avaina da vita da bleras vischnancas. Era da Zernez. Per auzar las entradas e per uschè da dir pudair mulscher pli fitg questa vatga da latg propona la suprastanza da permetter era per l’aua da Sagliains la producziun da forza electrica. Per Domenic Toutsch, il president communal èsi cler: «Nus vain dimena in prüma lingia ün interess finanzial vi da quist proget.»

Tratg ina massa grascha

Tenor ina retschertga en la nova ediziun dal Beobachter è Medel la pli attractiva vischnanca per abitar per ina famiglia: Puncto taglia, cuosts d’abitar e premias da cassas da malsauns battia la vischnanca al pe dal Lucmagn las ulteriuras vischnancas svizras. Ina raschun saja ch’ins haja tratg blera grascha ils ultims onns, respectiv fatg bunas investiziuns communalas per exempel en spazi d’abitar. Ch’i dettia era dischavantatgs da viver a Medel, da quai è dentant era pertschert il president da vischnanca Claudio Simonet.

Renovar la stalla

Il turissem è ina da las «vatgas da latg» dal Grischun. Mo per pudair mulscher turistas e turists endretg dovri era l’endretga infrastructura, vul dir bellas stallas per la muaglia turistica. Ina da las stallas che sto vegnir renovada è l’Hotel Cube a Savognin. Da quai è era il nov schef-strateg dal turissem da Surses Luzi Wirth persvadì, sco ch’el declera en la gronda intervista cun la FMR.

Bun divertiment cun la Lectura Rumantscha!