Lectura Rumantscha

Sandro Buchli/FMR, ils 27 da favrer 2026

Falera fa plans, Samedan sa legra – ed il computer gioga troccas.

Il project etern

Envi ed ennà, nua e co e cum, e sche insumma… Dapi circa 20 onns rapporta noss redactur Augustin Beeli dals plans per in grond hotel a Falera. Capità è pauc – enfin oz. Ma plaunsieu vegn schlantsch en chaussa. La mesemna saira ha la vischnanca envidà ad ina saira d’infurmaziun: Il nov cumplex duai avair varga 130 abitaziuns, ma bler pertutgant architectonica e finanzas n’è betg vegnì tradì quella saira. «I va ussa per animar e pussibilitar la discussiun culla populaziun», ha detg il president da vischnanca Norbert Good.

Durant ils Gieus olimpics a Milano Cortina 2026 è vegnì mussà ina massa curling en televisun. E tgi ch’è mo in zichel s’interessà, quel ha realisà che las Svizras han gudagnà ina medaglia d’argient. Tar questa squadra da success tutga era Selina Witschonke. Ed era sche il num «Witschonke» n’è pli probabel betg da chattar en las genealogias grischunas dals ultims 500 onns – in connex cun il Grischun ha l’atleta da Sempach tuttina: Ella è naschida a Samedan! Ed ella di: «L’Engiadina es per me aunch’adüna ün pô patria».

Enconuschas ti Youngjung Cho? Il student sidcorean da l’ETH Turitg ha sviluppà la pagina d’internet «troccas.com». E sin quella pagina sas ti dar troccas, sco sche ti fissas ell’ustaria! Almain bunamain – dal tut finida na saja la pagina anc betg, ha el raquintà a la FMR. Ma danunder ha in Sidcorean insumma l’idea da sviluppar ina tala? Igl è fitg simpel. Si’amitga Silvana Wieland è da Cumpadials.

Bun divertiment cun la Lectura Rumantscha!