Lectura Rumantscha

«Chicherichi» – temp per la Lectura Rumantscha.

Power per la Lumnezia

Tge faschessas ti, sche ti n’avessas nagina electricitad durant in di? Jau stoss admetter, jau na savess gnanc exact tge che capitass exact. Insanua hai jau legì, ch’ins stuess lura vaira segir cumprar aua sco emprim, perquai che la «pumpa» che maina l’aua en chasa dovra electricitad. En Lumnezia vegnan actualmain 24 kilometers novas lingias d’electricitad messas sut terra. Cun la finamira da reducir ils disturbis e megliurar la garanzia d’electricitad – e forsa era per impedir che tuts ston tar il proxim disturbi currer en butia per cumprar aua.

Cumparegliar las linguas minoritaras

In pievel alpin, tschintg idioms, ina lingua unifitgada – Da tgi discur jau? Exact! Dals Ladins da las Dolomitas! Sco ils Rumantschs en il Grischun sa preschenta là la situaziun sumeglianta. La doctoranda da la Val Badia Sophie Mangutsch cumpareglia per sia lavur co che las trais minoritads linguisticas ils Rumantschs, ils Ladins da las Dolomitas ed ils Furlans promovan e protegian lur lingua. Perquai ha ella era fatg ina visita pli lunga en il Grischun.

Nagina patinera a Mustér

Sco finiziun anc ina tematica pli «fraida». Era sch’igl è matg, en var 10 dis cumenzan ils campiunadis mundials da hockey sin glatsch en Svizra! E perquai dovri natiralmain, fitg simpel: glatsch artifizial. Glindesdi saira ha il cussegl da la vischnanca da Mustér dentant decidì da betg pli renovar la patinera tar il Center Fontauna. Quai munta era: La Cadi vegn ils proxims onns strusch a «producir» giugadurs u giugaduras che pudessan sajettar il puck en il gol per la Svizra. Ma forsa e quai er in pau ina tesa stravagada.

E per turnar al «chicherichi» dal cumenzament.Davart ils avantatgs e dischavantatgs d’esser cot u carstgaun scriva David Spinnler en la columna.

Bun divertiment cun la Lectura Rumantscha!