300 francs, in toc tschigulatta ed in «Big Boy» – quai è il menu dad oz.

Far politica per 300 francs

Tge faschessas ti cun 300 francs? Cumprar 300 tschigulattas ina per mintgamai in franc? U giessas forsa a cumprar in nov tschitschapulvra ch’è pli ruassaivel che tes actual? Basta – atgnamain è quai tia chaussa! Ils deputads e las deputadas grischuns discurran oz dentant era da 300 francs. Quai è la paja ch’els survegnan per in di da sessiun. E quella duai s’augmentar. I dess damai in meglier tschitschapulvra.

Il trenin da Mustér

«Dotto Big Boy 4×4», 38 plazs da seser, tempo maximal 30 kilometers l’ura. Quai èn las indicaziuns da basa dal «trenin desertin». Tuna bain patgific? Tenor in’interpresa indigena duai Mustér prest survegnir ina nova attracziun che circulescha ad Acletta e Fontanivas. Il cussegl da vischnanca ha dentant emprim anc da decider, sch’il Big Boy dastga vegnir en il vitg claustral.

Anorexia – ed uss in cudesch da cuschinar

Has ti gia planisà la tschaina dad oz? U es ti plitost il tip u la tipa da la varianta «café cumplet»? Tge e quant mangiar èn dumondas che han era occupà ferm Stephanie Mugwyler-Gredig da Seglias/Haldenstein. Sco giuvna ha ella gì da cumbatter cun anorexia – ussa è ella dentant cussegliadra da nutriment. In da blers tip ch’ella dat è: Tschigulatta n’è betg scumandada!