Lectura Rumantscha
FMR
La Lectura Rumantscha va oz a la tschertga dad eroxs ed eroxas!
La gallaria sco eroxa
In tunnel stgir ed umid – quai duai esser il salvament da Brinzauls? Quai è bain bler main spectacular che en in film da catastrofas american, nua ch’in erox u eroxa spendra entiras citads cun sappia Dieu tge gadget. En Svizra essan nus pli modests. A nus tanscha ina gallaria stgira da drenascha per salvar in pitschen vitg sco Brinzauls. E gist quel tunnel modest ha la FMR pudì inspectar.
La pumpiera «pensiunada»
Pumpiers e pumpieras èn stedi figuras en films dad action americans. Persunas che vegnan salvadas or d’in inferno da flommas fan impressiun. En vardad n’è la lavur dals pumpiers forsa betg adina talmain aventurusa, ma tuttina fitg impurtanta. Quai sa Sandra Püntener, l’inspectura districtuala dals pumpiers da l’Engiadin’Ota, Puschlav e Bregaglia. La dunna da 54 onns na stizza betg pli sezza incendis – ella saja gia «pensiunada» sco pumpiera. Ella saja però adina sper il lieu d’acziun per dar sustegn. E sustegn vul ella era dar a dunnas da daventar pumpieras.
Figlia e bab furman in champ d’energia
«Spescha & Spescha – Energy Fields» – quai pudess esser in brav film d’in pèrin dad action. Las energias na vegnan dentant betg duvradas per sajettadas e bastunadas a la Matrix, mabain las ovras d’art da figlia e bab furman camps d’energia. L’emprima giada vegnan mussads objects da Venice Spescha en cumbinaziun cun ovras da ses bab Matias Spescha barmier en l’exposiziun «Spescha & Spescha – Energy Fields».
A revair e bun divertiment cun la Lectura Rumantscha!
Gust da leger dapli?