Lectura Rumantscha

Gabriela Riedi
FMR

In di da chaliras cun temas ardents:

Il latg da la dumengia a Curaglia

Tranter da nus: Mintgatant vom jau a far ina pitschna cumissiun la dumengia. Magari manca il latg u il paun, ed a Cuira èn tschertas stizuns avertas tut ils dis da l’emna. Er en ils vitgs giavischa la glieud averturas pli vastas da sias fatschentas. Perquai vul la stizun cun café a Curaglia en la Val Medel introducir in sistem digital che pussibilitass averturas era da notg e dumengias senza persunal. Uschia hai jau forsa bainbaud era la pussaivladad da cumprar mes latg ina dumengia a Curaglia.

In boom da tir a Sent

Che gist la chatscha fa concurrenza a la Societad da tregants da Sent ma fa surstar. Na va quai betg in en l’auter? Para betg. La societad ha actualmain in boom da tiraduras e tiradurs giuvens. Uschè blers sco daditg betg pli fan ils curs da tir. Ma apunta blers da quels vulan lura pli tard daventar chatschaders u chatschadras – e lura sa mordan ils curs da tgira per la patenta cun ils curs da la societad da tregants. Omadus curs èn mintgamai la sonda.

In omagi a Paulin Nuotclà

«Sün seis viadi musical s’ha’l fat daplü amis co inimis», scriva David Truttmann en ses omagi a Paulin Nuotclà. Ed ins po dir che in da quels amis e betg inimis è segir noss schefredactur sez. El lascha passar la vita artistica da Paulin Nuotclà: Regurdanzas als comics cun Baldi, Niccal e Jaquan sin plazza scola ed a differents vers da chanzuns cumparidas sin las «omlettas sonoras in celluloid», sco che Paulin Nuotclà ha scrit sez sin ina da sias plattas da vinil. Paulin è mort, viva Paulin!

A revair e bun divertiment cun la Lectura Rumantscha!