Lectura rumantscha

Toni Vinzens
FMR

Premiera sin 2150 m s.m.

Las Engiadinaisas ed ils Engiadinais èn sportivs. Cunzunt sin naiv fan els ina buna parita. Damain disads èn els probablamain da far sport en il resgim. Il sport da la lutga è numnadamain strusch anc etablì en l’Engiadina, ma quai pudess prest sa midar: Si La Motta sur Scuol vegn installada quels dis in’arena per l’emprima festa da lutga chantunala en l’Engiadina Bassa. E sco ch’ils responsabels han fatg a savair, è l’interess grond da pudair guardar a lutgar ils «nauschs» sin 2150 m s.m.

25 onns CB Lumnezia

Dapi in quart tschientaner curran Lumnezians e Lumnezianas mo pli ensemen suenter a la «culla». Il 2001 han ils anteriurs clubs da ballape da Degen e Vella numnadamain fusiunà e mess ad acta lur rivalitad. Quai è era sa mussà a la festa da giubileum che ha gì lieu la fin d’emna a Bual. E tuttina, sper ils gieus per grond e pign n’han ins sa chapescha betg laschà mitschar la chaschun e fatg reviver il derbi d’antruras cun in gieu da «legendas».

Tello è turnà

Sco en Lumnezia è er a Sagogn turnada ina «legenda», quai dentant betg sin la plazza da ballape, mabain sin il palc. A chaschun da ses 25avel anniversari ha la gruppa da teater da Sagogn numnadamain preschentà gievgia passada per l’emprima giada il toc «In asen per Tello». E sco ch’i para ha il teater sut tschiel avert procurà per curturella – era sche l’asen misterius cumpara pir en la pli davosa scena.

A revair e bun divertiment cun la Lectura Rumantscha!