Lectura Rumantscha

Gabriela Riedi
FMR

Ina buna ed ina schletta novitad

Atgnamain èsi ina buna novitad che uschè bleras persunas fan diever da quella purschida. Ma il medem temp èsi er ina trista nova. Il nov local da consumar drogas a Cuira vegn nizzegià stediamain. Quai mussa ina bilantscha trais mais suenter l’avertura. Er ils responsabels han gì ina buna ed ina schletta novitad da palesar davant las medias: I vegnia consumà damain drogas or en il liber en citad, la criminalitad dals toxicomans e las toxicomanas saja però restada auta.

Ils big three: Luf, urs e luf-tscherver

Ir sin safari cun apparat da fotografar en l’auto sin la tschertga dals big three dal Grischun: luf, urs e luf-tscherver. Gist quai na dessi betg esser, il nov project da pilot turistic. Planisadas èn però spassegiadas ed excursiuns tematicas soft per exempel en il Parc Naziunal Svizzer ed en autras regiuns grischunas. In studi ha damai mussà che l’interess dals turists è grond per quels animals gronds da rapina, il cuntrari ad autras persunas che vulan avair davent il luf e co. E quai è era gist la sfida dad elavurar quellas purschidas turisticas.

Parturir sco a chasa, forsa er en Surselva?

Parturir n’è betg gist la pli bella chaussa dal mund, il resultat lura schon. Per che las deglias e dolurs vegnan pli supportablas, èsi bun, sch’il setting constat. E quel conturn famigliar ed intim porscha la chasa da parturir a Vaz Sut. Igl è ina alternativa a l’ospital magari steril e hectic. E forsa er ina alternativa per la Surselva che n’ha forsa bainbaud betg pli ina partiziun da parturir?

A revair e bun divertiment cun la Lectura Rumantscha!