Lectura Rumantscha
FMR
La Lectura Rumantscha surmunta oz cunfins linguistics cun gests e mimica, ma era cun l’intelligenza artifiziala, e va a la tschertga da la verva virila.
Il teater surmunta
L’Hotel Scuol Palace a Nairs è stà questa fin d’emna en il vair senn dal pled ina culissa per in eveniment tut spezial. La Biennala dal teater d’amaturs svizzer ha giastà en l’Engiadina Bassa. En tuttas quatter linguas naziunalas èsi vegnì fatg teater. Ed era sche betg tuts e tuttas han chapì tut las linguas, han gests e mimica gidà d’encleger ils tocs.
Vuschs virilas archivadas
Ve nà! Nus pudain dar ensemen in cuc en l’archiv da la Ligia Grischa. Il chor viril festivescha l’auter onn ses giubileum da 175 onns. E lura èsi be logic da far ina visita en il sulet archiv d’in chor sursilvan a Glion. Fotografias cun retschas dad umens, pli baud anc cun chapels, pli tard lura adret en mandura u be chamischa e cravatta, spetgan en stgatlas. E natiralmain er anecdotas da quels che preschentan l’archiv.
La IA e las linguas minoritaras
L’intelligenza artifiziala (IA) vegn adina pli fitg part da nossa vita, era sch’ins tschantscha rumantsch. En mes quotidian dovr jau regularmain maschinas da translatar en rumantsch. Per linguas minoritaras po quel svilup tecnologic esser ina schanza. Quai ha discussiunà in forum da linguas minoritaras l’emna passada a Cuira. «La IA po esser in catalisatur per la furmaziun, da preservar la cultura e per il svilup dad ina lingua pitschna. La tecnologia suletta na garantescha betg il surviver», ha però constatà in participant.
A revair e bun divertiment cun la Lectura Rumantscha!
Gust da leger dapli?