Lectura Rumantscha

In daletg custus a Turitg

La citad da Turitg è fitg chara – «sautüür». Ella vala apunta sco ina da las diesch citads las pli charas dal mund. E quai senta uss er il Grischun. Sco chantun envidà dal Sächsilüüte sto quel pajar, malgrà esser giast, or da l’atgna bursa las spesas e spaisas da sia delegaziun. En tut quinta il Chantun cun in mez milliun francs per dastgar far part da la party dal Böögg.

Nagin daletg a Siat

Ils da Siat han avunda dals campaders sisur il vitg, u meglier ditg da lur sa cumportar: els dismettian rument en il guaud e fetschian lur basegns en la natira – empè da duvrar il compotoi mess a disposiziun. Insumma, igl è ina portgaria sisur Siat e lura anc ina gratuita. Sch’ils campaders pajassan almain insatge, fissi in’autra istorgia. Mo uschia haja il campadi pauca valur turistica e possia svanir.

Discussiuns e daletg Ftan

L’emprim il duair e lura il daletg! – Quai è il princip fundamental da pli u main tuttas radunanzas generalas. Uschia èsi pia era stà tar quella da l’Uniun dals Grischs la fin d’emna passada a Ftan: L’emprim ha la radunanza discutà las dumondas pli e main spinusas sco il sustegn da la Lia Rumantscha per il Chesin Manella u l’elecziun da la nova co-presidenta. E silsuenter ha Linard Candreia delectà cun raquints divertents.

A revair e bun divertiment cun la Lectura Rumantscha!