Lectura Rumantscha

Fufragnar en auters munds è oz la devisa en la Lectura Rumantscha.

Crap e crap fa mir

La spassegiada vers la baselgia da Sontga Gada a Mustér hai jau gia fatg numerusas giadas. E natiralmain hai cutizzà inqual giadas da prender in da quels craps lucs sin ils mirs dretg e sanester ed al metter insanua auter. Jau sai però dir cun buna conscienza che suenter tut mias spassegiadas èn tut ils craps restads al lieu ed ils mirs sitgs intacts. Tuttina fai da basegn da temp en temp da renovar quels mirs fatgs senza maulta. 15 emprendists da miradurs da la Surselva han pudì emprender quella tecnica e fufragnar a Sontga Gada co preparar senza maulta e paucs guaffens in mir che tegna.

Buatscha, fain e cumpagnia

In pèr generaziuns enavos ha quasi l’entir Grischun fatg il pur u la pura. Quai è dentant sa midà fitg. Ils purs e las puras vegnan adina pli stgars. Tuttina è l’agricultura anc fitg preschenta en noss chantun. Per quai procura era l’exposiziun agricula Agrischa. Quest onn ha quella envidà a Zernez da bell’aura da charsinar chauras e natiralmain fufragnar tuttas differentas odurs, bunas u schlettas, en connex cun il puresser.

Da greens, cifras e l’aura

En las vacanzas da primavaira hai jau puspè ina giada gì ina palutta da golf enta maun, però be ina pitschna da mini-golf. Tar la pista lunga da pastg hai jau dentant adina la pussaivladad da fufragnar in zichel co ch’i fiss da giugar endretg golf. Mes fufragnadi cumplettescha uss il president dal club da golf da Sagogn Markus Diethelm che dat in’invista en ses manaschi a tuts e tuttas be mini-golfists sco jau.

In bun fufragnadi cun la Lectura Rumantscha!