Lectura rumantscha

Bainvegni a la Lectura Rumantscha – oz cun in classicher dad in slogan rumantsch: «Da Mustér a Müstair».

In viva sin l’Umbrail

Sche ti vas gugent cun töf u cun velo, lura enconuschas ti franc quest pass! Il Pass da l’Umbrail cun massada curvas che collian la Val Müstair cun Buorm. E dal rest: El è il pli aut pass charrabel da l’entira Svizra. Sonda passada ha la populaziun festivà il giubileum da 125 onns da questa colliaziun «da linguas e culturas», sco che la presidenta communala da la Val Müstair, Gabriella Binkert Becchetti, ha ditg a la festa.

In project da vaglia a Mustér

Pliras stortas andetgas ha il project «Acla da Fontauna» a Mustér stuì prender en il decurs dals ultims onns. Ussa para tut dad esser pront per il nov resort cun abitaziuns ed hotel ch’è calculà cun custs da passa 100 milliuns francs. Il venderdi saira han 130 persunas tadlà plain attenziun tge che suprastanza e cussegl communal han gì da raquintar da nov. Cun Carmelia Maissen e Marcus Caduff èn gist dus cussegliers guvernativs stads da la partida a questa infurmaziun.

Tge è insumma «il pli absolut»?

Sas ti tgi che ti elegias ils 14 da zercladur per la regenza grischuna? Nov candidatas e candidats sa mettan a disposiziun, e mintgin/a dad els ed ellas spera da pudair recaltgar avunda vuschs. «Avunda vuschs», quai munta cun in term tecnic «il pli absolut ». Gist tar il cumbat per il tschintgavel sez da la regenza pudessi però esser che nagin dals candidats e da las candidatas na cuntanscha «il pli absolut». Tuna quai «absolut» cumplitgà per tai? – Lura dat mia collega Claudia Cadruvi las explicaziuns.

Ed ina «absolut» bellischma columna cun in’interessanta storta furnescha oz Arnold Spescha.

A revair e bun divertiment cun la Lectura Rumantscha!