Lectura rumantscha

Es ti forsa en tschertga dad in stgazi? U forsa da milliuns e marenghins? – Lura po la Lectura Rumantscha dar in u l’auter tip.

«Hai jau udì endretg?

Sche jau legel las summas per projects d’infrastructura (per vias, binaris, punts e tunnels), lura ma dumond jau mintgatant tut stupefatg: «Quant? Hai jau legì endretg?» – Quai hai jau era ma dumandà oz, legend la summa d’investiziun per in tschancun da 3,5 km en il Partenz. Tranter Küblis e Filisur investeschan Confederaziun, Viafier retica e Chantun numnadamain prest 470 milliuns francs. Quant? – Geabain, ti has legì endretg!

La pertgiradra dal stgazi

Martina Shuler-Fluor ha a prima vista in job sco bleras autras persunas. Ella è manadra da gestiun da la Chesa Planta a Samedan. Quai è LA chasa da lingua e cultura rumantscha en Engiadin’Ota. Ma sco che la manadra da gestiun tradescha en in’intervista, ha ella apparentamain tut in’autra incumbensa: Ella è pertgiradra dad in stgazi. En l’anteriura chasa patriziana sa zuppan numnadamain uschè bleras truvaglias, che Martina Shuler-Fluor avess ideas per exposiziuns per ils proxims 100 onns.

Ina brev da Glion

Il pli grond stgazi èn dentant noss uffants! Questa frasa gusta forsa schon in pau ferm da zutger, surtut per geniturs che han mintgatant ils agens uffants che fan vegnir las 24 … – ma quai è in auter tema! Ils uffants èn e restan in stgazi, surtut per in ospital regiunal e sia partiziun da naschientscha. A Glion datti dentant discussiuns da serrar quella, e perquai sa dostan las spendreras cun ina brev averta.

Buna lectura e bun success cun tschertgar e chattar stgazis da milliuns e marenghins!