Lectura rumantscha

En grondas parts dal chantun Grischun cumenzan quests dis las vacanzas da stad – juhè! E precis sin quel cunfin magic tranter «scola» e «vacanzas» va a spass oz la Lectura Rumantscha.

La carriera da scolastas e scolasts

Jau sun scolast. En teoria. Sche jau turnass a dar scola, lura stuess jau far silmain 63 curs da perfecziunament! Bler ha midà ils davos onns en las stanzas da scola. Ma cura che jau hai entschet mia emprima plazza da magister a Scuol, aveva ditg in collega: «So, quai fissi stà cun tia carriera professiunala. Per in scolast na datti – cun excepziun da daventar inspectur – nagins stgalims ensi!» Insumma, il Tuatschin Vigeli Jacomet ha fatg avant 16 onns quel pass ensi. Ma suenter questas vacanzas da stad turna el en scola, sco scolast. È quai uss in pass ensi, engiu u envi?

Dal scolast al president

Era Marcus Beer è stà scolast. Ma ils davos onns, fin suenter sia pensiun, ha el lavurà sco president communal da la vischnanca Ilanz/Glion. Ussa ha el decis – per raschuns da sanadad – da remetter ses uffizi sin la fin da quest onn. En l’intervista cun noss collega Martin Gabriel ha el manegià ch’i dovria in successur u ina successura che haja «dapli diplomazia che quei ch’jeu haiel giu en certas situaziuns». Insumma, memia blera diplomazia pudess er esser lungurusa.

Ils «piccoli asini di Sent»

Nua vas ti en vacanzas? – Lain engiavinar: en Italia? Il «bel paese» è probabel la destinaziun preferida da blers: mar, sulegl e pizza. Il viadi cuntrari – da l’Italia en Svizra – han fatg il pizzaiolo Salvatore Pantano e sia dunna Nadia Borgese. Dapi in decenni mainan els ina pizzaria a Sent e bainprest er ina pensiun. Els sa sentan uschè bain ch’i sa numnan sezs «piccoli asini di Sent».

E sche Vus vulais gia avair, curt avant las vacanzas, in pau tempra da «l’estate italiana», lura recumond jau da leger la columna da Giulia Romano, in text frestg si da la Toscana!