Lectura Rumantscha

La nettegiada gronda dal Spöl

Tgi schubregia schon gugent? Jau almain betg. Sanar il Spöl dal tissi PCB fiss pia nagut per mai: Prender crap per crap e graun per graun e nettegiar quels. Ina lavur da Sisifus. Per il Spöl e ses abitants però necessari, uschiglio na datti betg vita en l’aual. La squadra da nettegiar è dapi il matg en acziun, natiralmain betg sco jau cun tschitschapulvra e lumpa, mabain cun baggers e scienziads che controllan las lavurs e valurs dal PCB.

Ils dents e la sutga

Da temp en temp dovran er ils dents ina nettegiada profunda, però speranza betg da PCB. Sch’il barschun e la pasta da dents na fan betg pli traglischar mes dents, vom jau tar l’igienicra da dents, però era navidas. Forsa sto be simplamain la sutga esser cumadaivla per ch’ins giess gugent. Quai ha Fabienne Columberg da Mustér pensà. Ella ha avert tut persula ina pratica da nettegiar ils dents. Igl ha dentant duvrà in pe en tgil da sias collegas – ed ina sutga aparti agreabla per clientas e clients.

Las ramurs d’ina val

Suenter ils strapatschs da schubregiar dovri per mai definitivamain ina recreaziun. E quella datti cun la segunda Vitrina en la Val Medel. A Pardé avra bainbaud ina stalla ch’è endrizzada sco museum cun il num La Vitrina. Quel mussa las atgnadads da la val, il dialect e la vita da pli baud. Ina spezialitad è ina stanza nua che las ramurs da la vischnanca èn d’udir. Igl è sco ina spassegiada per las ureglias. Gist l’endretg suenter las ramurs sin la sutga da l’igienicra da dents.

A revair e bun divertiment cun la Lectura Rumantscha!