Lectura Rumantscha

Geabain, la lectura dal di è «back» cun ses slang – vul dir in remix da rap rumantsch, l’imni naziunal e las sirenas dals pumpiers.

Il rapper viticultur

Ina giada è el stà enconuschent sut il num «Orange», Renzo Hendry che ha rappà durant passa 20 onns sin pli u main tut ils gronds e pitschens palcs da la Svizra. Dapi quatter onns è quest chapitel da sia vita, il chapitel da las «Liricas Analas», dentant passà. Ussa sa focussescha el cun tutta energia sin la lavur sco viticultur a Sargans. Schegea, mustgas da far musica avess el tuttina – «il fiug brischa aunc.» Mo prioritad haja ussa la lavur. Che «Orange» turna insacura cun ses slang sin il palc, n’è però betg sclaus.

En l’aurora la damaun …

Sas ti ordadora il «Psalm svizzer», also propi l’entir imni e betg mo l’emprima strofa? Lura es ti in da paucs, probablamain. Pertge nus Svizzers e Svizras na parain en general betg dad esser uschè cuntents cun noss imni. El saja memia meditativ ed haja memia pauc schlantsch ed entusiassem, cunzunt en cumparegliaziun cun ils imnis da noss vischins en il vest ed il sid. E tuttina para il «Psalm svizzer» dad esser il pli impurtant durant concurrenzas sportivas. Insumma, nossa relaziun cun l’imni naziunal è – cun ils pleds da l’anteriur schefredactur da «La Quotidiana» Martin Cabalzar – «empau disturbada».

Il pli aut pumpier grischun

Buolf Armon Planta è dapi radund 100 dis il pli aut pumpier dal Grischun. En il discurs cun la Posta Ladina è perquai era la sitgira stada in tema. En cas da fieus en lieus isolads pudess quella chaschunar problems per pumpiers, sco ch’el ha ditg. Pertge tut tenor situaziun stoppian ins lura «ir plü dalöntsch per l’aua.» Sco pli aut pumpier dal Grischun na sa fatschenta Buolf Armon Planta però betg mo cun talas sfidas. Sia finamira saja er da facilitar la recrutaziun da pumpiers e cader.

Bun divertiment – u cun ils pleds da las «Liricas»: «Essas ready per ei?»