Lectura Rumantscha

Ils trais plazzals da la lectura dal di èn oz: cunvegnas da congual, chauns da protecziun ed il Juliertrail.

In plazzal da nov milliuns

Il cartel da bajegiar dal Grischun ha scrit ses proxim chapitel. Quella giada vai per las cunvegnas da congual tranter Chantun e vischnancas e las 15 firmas culpantas – ubain per 600 paginas e radund nov milliuns francs. Quai èn numnadamain las cifras fundamentalas da las cunvegnas ch’il chantun vuleva tener secret. Mo grazia al schurnalist Michael Spillmann da SRF èn quellas tuttina vegnidas publitgadas. Quest plazzal giuridic ha dal reminent cuzzà set onns.

In plazzal cun ils chauns

«Cave canem!» ubain «Adatg dal chaun!» – Sco ozendi las tavlas d’avertiment rendevan schon ils Romans avant 2000 onns attent a lur animals da chasa. E tuttina procura il meglier ami dal carstgaun anc adina per plazzals. Actualmain, sco ch’i para, cunzunt sisum la Surselva en las vischnancas da Tujetsch e Medel. Leu hai dà reclamaziuns dad indigens e giasts ed attatgas da chauns da protecziun. Sco che las cifras dal Grischun mussan, èn chauns da protecziun però mo responsabels per ina pitschna part da las morsas, vul dir tschintg pertschient u 15 da totalmain 350 cas ad onn.

In plazzal communabel

Na, nozzas n’han las vischnancas da Surses e Silvaplana betg fatg. Ma l’emprima badigliada dal Juliertrail sin il Güglia è schon in pau sco in spusalizi. L’anè dals spus è en quest cas la senda da viandar e bike che vegn construida en il decurs dals proxims stgars dus onns. E cura che las lavurs sin il plazzal communabel èn terminadas, tgisà tge che capita cun las duas vischnancas. Almain l’associaziun Turissem Val Surses Savognin Beiva ha la speranza che las duas regiuns s’avischinian anc pli fitg.

E sa chapescha che la Lectura Rumantscha ta furnescha er oz ina pitschna purziun 1. d’avust, quai cun la columna da Claudia Cadruvi. A revair e bun divertiment!