Lectura Rumantscha

Sport total regia oz en la Lectura Rumantscha. – In nausch siemi per Winston Churchill, ina buna lectura per nus.

Ballape total

Mo sche jau patratg da stuair siglir suenter ad ina balla, suel jau anc pli fitg che gia ussa. Probablamain fan era attatgadras e defensurs betg sigls en l’aria da cumenzar il campiunadi da ballape regiunal questa fin d’emna da quellas chaliras. L’emprima squadra da l’Uniun sportiva Schluein Glion vegn tuttina ad esser fitg motivada, ella gioga numnadamain da nov en la 2. liga regiunala. Encunter Buchs vegn la balla a rullar ed il suaditsch a cular.

Tennis total

Nus midain dal pastg sin il sablun da Trun. Là vegn questa fin d’emna era fatg sport, mo il suaditsch vegn forsa remplazzà cun ina u l’autra gervosa – dal reminent ina bavronda isotonica. Il club da tennis da Trun festivescha numnadamain 50 onns. Il president ed il cronist dal club dattan in sguard enavos ed enavant e giogan en il discurs ina u l’autra assa.

Sport total par excellence

La vita da Luana Bergamin gira enturn il sport. Sco interprendidra organisescha ella eveniments da sport e schizunt sco deputada s’engascha ella per il parasport. Dapi il mars 2026 è ella era presidenta da Swiss Cycling, la federaziun tetgala per il sport da ciclissem. En tut sias funcziuns fa Luana Bergamin ina atgna Tour de Suisse d’in lieu a l’auter, dentant betg sin il velo, mabain cun il tren.

Bella fin d’emna cun far sez sport, consumar sport u simplamain leger la Lectura Rumantscha!